तनहुँ । बलात्कार मुद्दामा पुर्पक्षका लागि थुनामा रहेका अभिनेता पल शाह तनहुँ जिल्ला कारागारको नयाँ भवनमा छन्। पल शाहलाई राखिएको ‘बी’ ब्लकमा २० जना कैदीवन्दी छन्। कारागारको यो नयाँ भवन हो। दुईतले भवनको माथिल्लो तलामा सुत्नेरबस्ने व्यवस्था छ भने तल्लो तलामा खाना खाने, खेल्ने र लाइब्रेरी।
शाह कारागारको बन्दी बनेको ५ दिन मात्रै भयो। यो पाँच दिनमै उनी आफ्नो ब्लकका अन्य कैदीबन्दी सँग घुलमिल भइसकेका हुन्। करिब ५ सय पुस्तक सहितको लाइब्रेरी छ। बेलाबेला पुस्तक पढ्छन्। तर उनलाई आफन्त भेटघाटमै भ्याइनभ्याइ छ। भेटघाट बाट बचेको समय क्यारम बोर्ड खेल्छन्। ब्लकभित्र चेस खेल्ने सुविधा पनि छ।
कारागार प्रशासनले उनलाई सकेसम्म भेटघाट कम गर्न र आफ्ना निकटलाई मात्रै बोलाउन भनेको छ। उनलाई भेट्न जाने नातागोता आफन्तहरूलाई सहजै भेटघाट गर्ने वातावरण बनाउन प्रशासनले भनेको छ। उनी बस्ने ब्लकमा थरीथरी मुद्दाका कैदीबन्दी छन्। जिल्ला कारागारले मुद्दाअनुसार छुट्टाछुट्टै कैदीबन्दी राख्ने गरेको छैन। कारागारमा १३ महिला सहित २ सय ५७ जना कैदीबन्दी छन्। पलविरुद्ध जिल्ला अदालत नवलपुर परासी पूर्वमा पनि बलात्कारकै मुद्दा दर्ता भइसकेको छ। त्यहाँ थुनछेक बहस हुन बाँकी छ। त्यसका लागि उनलाई केही दिनमा नवलपुर लगिनेछ। जिल्ला अदालत नवलपुरले थुनछेक बहसका लागि पल शाहलाई पठाइदिन पत्र पठाइसकेको छ। तर तनहुँ जिल्ला अदालतले अहिले सम्म कारागारलाई केही भनेको छैन। अदालतबाट आदेश आएपछि उनलाई नवलपुर पठाइदिने जेलर नारायण अधिकारीले बताए।
जिल्ला अदालतले पुर्पक्षका लागि थुनामा पठाएको विरुद्ध पल शाहले उच्च अदालतमा अपिल गर्ने भएका छन्। उनका कानुन व्यवसायीले केही दिनमै उच्च अदालत पोखरा मा पुनरावेदन दिने बताएका छन्।
.jpg)
